വിമ്പിൾഡൻ ചാംപ്യഷിപ് യൂട്യൂബിൽ അപ്ലോഡ് ചെയ്ത ‘ദ് റോൾ റിവേഴ്സൽ ചാലഞ്ച് പാർട്ട് 1’ എന്ന വിഡിയോയിൽ ഇന്ത്യൻ ക്രിക്കറ്റ് താരം സഞ്ജു സാംസണും ടെന്നിസ് ഇതിഹാസം രോഹൻ ബൊപ്പണ്ണയും തമ്മിലുള്ള രസകരമായ ക്രോസ്ഓവർ പ്രകടനമാണ് ശ്രദ്ധേയമായത്. ഷാഹിബ ബാലി അവതാരികയായ വിഡിയോയിൽ, ടെന്നിസ് റാക്കറ്റ് ഉപയോഗിച്ച് ബോൾ ചെയ്ത് ഒരോവറിൽ പരമാവധി റൺസ് നേടാനാണ് ഇരുവരും ശ്രമിക്കുന്നത്. സാധാരണ ക്രിക്കറ്റ്–ടെന്നിസ് കൂട്ടുകെട്ടിൽനിന്ന് വ്യത്യസ്തമായി ഒരുക്കിയ ചാലഞ്ച് ആരാധകരുടെ ശ്രദ്ധ പിടിച്ചുപറ്റി.
ആദ്യ ഓവറിൽ ബൊപ്പണ്ണയാണ് ബോൾ ചെയ്തത്. തുടക്കത്തിൽ വൈഡ് വഴങ്ങി, തുടർന്ന് സഞ്ജു സിംഗിൾ എടുത്ത് മികച്ച രീതിയിൽ കളിയിൽ പ്രവേശിച്ചു. ഉടൻ തന്നെ ഗ്രൗണ്ടിന് മുകളിലൂടെ ഒരു കൂറ്റൻ സിക്സർ, തുടർന്ന് ഫൈൻ ലെഗിലൂടെ മനോഹരമായ ഫോറും സഞ്ജു പായിച്ചു. എന്നാൽ കളിയുടെ ഗതി മാറ്റി, 101 കിലോമീറ്റർ വേഗതയിലുള്ള പന്തിലൂടെ ബൊപ്പണ്ണ സഞ്ജുവിനെ ക്ലീൻ ബൗൾഡ് ആക്കി. ഓവറിന്റെ അവസാന പന്ത് 131 കിലോമീറ്റർ വേഗത്തിലാണ് എറിഞ്ഞത്. ആകെ 15 റൺസാണ് സഞ്ജു ഈ ഓവറിൽ നേടിയത്.
തുടർന്ന് ബൊപ്പണ്ണയ്ക്ക് ബാറ്റിങ്ങിനുള്ള അവസരം ലഭിച്ചു. ആദ്യ പന്തിൽ തന്നെ പിഴച്ചെങ്കിലും പിന്നീട് തുടർച്ചയായ ബൗണ്ടറികളോടെ താരം തിരിച്ചുവന്നു. സഞ്ജുവിനെതിരെ ഒരു ഡോട്ട് ബോൾ മാത്രമേ ബൊപ്പണ്ണയെ നേടാനായുള്ളൂ എങ്കിലും, ആറു പന്തുകളിൽ നാല് ഫോറുകളുമായി അദ്ദേഹം 16 റൺസ് നേടി. ആകെ 16 റൺസാണ് സഞ്ജു വഴങ്ങിയത്. മത്സരാത്മകതയേക്കാൾ കൂടുതൽ സൗഹൃദവും ഹാസ്യവും നിറഞ്ഞ സംഭാഷണങ്ങളാണ് വിഡിയോയുടെ പ്രധാന ആകർഷണം.
വീഡിയോയുടെ തുടക്കത്തിൽ ടെന്നിസുമായി ബന്ധമുണ്ടോ, മുൻപ് കളിച്ചിട്ടുണ്ടോ എന്ന അവതാരികയുടെ ചോദ്യങ്ങൾക്ക് സഞ്ജു നൽകിയ തമാശ നിറഞ്ഞ മറുപടികളും ശ്രദ്ധ നേടി. “ടെന്നിസുമായുള്ള ബന്ധം ഇപ്പോൾ തുടങ്ങിയതേയുള്ളൂ” എന്നായിരുന്നു അദ്ദേഹത്തിന്റെ പ്രതികരണം. ഏറ്റവും ഇഷ്ടപ്പെട്ട ടെന്നിസ് താരമായി സഞ്ജു പറഞ്ഞത് രോഹൻ ബൊപ്പണ്ണയെയാണ്. അതേസമയം, ഏറ്റവും ഇഷ്ടപ്പെട്ട ഇന്ത്യൻ ക്രിക്കറ്റ് താരമായി ആരെയാണെന്ന് ചോദിച്ചപ്പോൾ ബൊപ്പണ്ണ “വിരാട് കോലി” എന്നായിരുന്നു മറുപടി നൽകിയിരിക്കുന്നത്. ആർസിബി ആരാധകനാണെന്നും അദ്ദേഹം വ്യക്തമാക്കി. ഇരുവരും തമ്മിലുള്ള കളിയാക്കലും സൗഹൃദപൂർണമായ ഇടപെടലുകളും വിഡിയോയെ കൂടുതൽ ആകർഷകമാക്കി.
ഓൺ-സ്ക്രീൻ പ്രകടനത്തിന് പുറമേ, ഇരുവരുടെയും പരസ്പര ബഹുമാനവും ലളിതമായ ഹാസ്യവും പ്രേക്ഷകരെ ആകർഷിച്ചു. ചാലഞ്ച് ആരംഭിക്കുന്നതിന് മുൻപ് “ഒരു ടെസ്റ്റ് താരത്തെ പോലെ തോന്നുന്നു” എന്ന സഞ്ജുവിന്റെ പ്രതികരണവും വൈറലായി. വിഡിയോയുടെ ആദ്യ ഭാഗം തന്നെ സോഷ്യൽ മീഡിയയിൽ ശ്രദ്ധ നേടിയതിനാൽ രണ്ടാം ഭാഗത്തിനായി ആരാധകർ കാത്തിരിക്കുകയാണ്.
രോഹൻ ബൊപ്പണ്ണ ഇന്ത്യയുടെ ഏറ്റവും ശ്രദ്ധേയമായ ഡബിൾസ് ടെന്നിസ് താരങ്ങളിൽ ഒരാളാണ്. പുരുഷ ഡബിൾസിൽ ലോക ഒന്നാം നമ്പർ റാങ്കിലെത്തിയ അദ്ദേഹം 2024ലെ ഓസ്ട്രേലിയൻ ഓപ്പൺ പുരുഷ ഡബിൾസ് കിരീടവും നേടി. രണ്ടുപതിറ്റാണ്ടിലേറെ നീണ്ട കരിയറിൽ പല എടിപി മാസ്റ്റേഴ്സ് കിരീടങ്ങളും സ്വന്തമാക്കിയ ബൊപ്പണ്ണ, ഒളിംപിക്സ്, ഡേവിസ് കപ്പ്, ഏഷ്യൻ ഗെയിംസ് എന്നിവയിൽ ഇന്ത്യയെ പ്രതിനിധീകരിച്ചു. ഇന്ത്യൻ ടെന്നീസിന് നൽകിയ സംഭാവനകൾക്ക് പത്മശ്രീ, അർജുന അവാർഡ് എന്നിവയും ലഭിച്ചിട്ടുണ്ട്.
മലയാളി താരമായ സഞ്ജു സാംസൺ ഇന്ത്യൻ ക്രിക്കറ്റ് ടീമിലെ പ്രധാന താരങ്ങളിൽ ഒരാളാണ്. ഇക്കഴിഞ്ഞ ട്വന്റി20 ലോകകപ്പിൽ ‘പ്ലെയർ ഓഫ് ദ് ടൂർണമെന്റ്’ പുരസ്കാരം നേടിയ അദ്ദേഹം ഐപിഎല്ലിലും മികച്ച പ്രകടനം പുറത്തെടുത്തു. നിലവിലെ സീസണിൽ ചെന്നൈ സൂപ്പർ കിങ്സ് പ്ലേഓഫ് കാണാതെ പുറത്തായെങ്കിലും, രണ്ട് സെഞ്ചറികളും ഒരു അർധസെഞ്ചറിയും ഉൾപ്പെടെ സഞ്ജു തിളങ്ങി.
